പ്രണയഭേദങ്ങള്‍

നിന്‍റെയും എന്‍റെയും മൌനത്തിന്‍റെ ചൂടില്‍

അടയിരുന്നടയിരുന്ന് വന്ധ്യമായിരിക്കുന്നു
ഒരൊറ്റ വാക്കിന്‍റെ വാചാലതയില്‍
കൊരുത്ത് വച്ച എന്‍റെ പ്രണയം 

പിറന്നു വീഴാനായുംപോഴെല്ലാം
പാകമായില്ലെന്നു തീര്‍പ്പാക്കി
കൊട്ടിയടക്കുന്ന ഗര്‍ഭ പാത്ര മുഖത്ത്
നീര് കെട്ടുന്ന ഒരൊറ്റ വാക്കിന്‍റെ നിസ്സഹായത 

 *********************** 

പ്രണയത്തി ന്‍റെ  കള്ളത്രാസ്സില്‍  

പകുത്തെടുക്കുമ്പോള്‍

നി ന്‍റെ  കണ്ണ് വെട്ടിച്ചു കവര്‍ന്ന

ഒരു കഴഞ്ച് വേദനയായിരുന്നെന്‍റെ പ്രണയം 

********************

തിരയിറങ്ങുമ്പോള്‍

കരയില്‍ മറന്നിട്ടൊരു

പിരിശങ്കില്‍  അടങ്ങാതെ കരയുന്ന

ഒരു തുണ്ട് കടലിന്‍റെ ഓര്‍മ്മകളായിരുന്നെന്‍റെ  പ്രണയം   

*******************

ഇണ ചേരുന്ന രണ്ടു മീനുകളിലോന്നിനെ

സുരതസുഖത്തിനും മുന്‍പേ

ഒറ്റിയെടുത്ത് പറന്നൊരു നീലപൊന്‍മാന്‍റെ

ഔചിത്യമില്ലാത്ത വിശപ്പായിരുന്നെന്‍റെ പ്രണയം 

*********************

ഇനി പറയുക ,

പ്രണയത്തിന്റെ മഴവില്ല് വരയ്ക്കുമ്പോള്‍

നിസ്സഹായതയെ ,വേദനകളെ 

നഷ്ടബോധങ്ങളെ ,സ്വാര്‍ത്ഥതയെ ,

ഏത് നിറങ്ങള്‍ കൊണ്ട് അടയാളപെടുത്തണം ???

(ചേര്‍ത്ത് വയ്ക്കാനാവാത്ത വൈരുധ്യമാണ് പ്രണയത്തിനെന്നു തോന്നിയത് കൊണ്ടാണ് വരികളെ പിടിച്ചു കെട്ടാതിരുന്നത്.......)